اليوم جايكم بأحلى الأكلات المكاوية في كل مناسبة

[همس الحنين]

اليوم جايكم بأحلى الأكلات المكاوية في كل مناسبة

انا اعرف ان اغلب الناس محا تفهم اللهجة، بس مشو حالكم


الرز بحمص و السقط و المعرق أو المختوم و الششني

·هادي الأكلات خاصة بالعزا وزيادة في التوضيح اليوم الأول والتاني والتالت يطبخو الرز البحمبص واليوم التالت



·اللي يسموه قطع العزا يسوو الششني والمعرق والمختوم والسقط



الكابلي أو الزربيان و السمبوسك و الطورمبة

·هادي يسووها وقت المناسبات والأفراح للرجال أما الحريم يجيبولهم الميز طبعا زمان أول مافي لا ميز ولا يحزنون

·ياكلو من نفس أكل الرجال بس يسوو قليل بريك

·او بف بالجبنة والا باللحمة شغل بيتي يعني واللي تعرف تسوي

·كيك بالبرتكان او الموز تسوي صينية علشان يحلو بيها بعدين جانا الميز والشغلات الجديدة هادي .



المعدوس ( الرز عدس )

هادا يسووه المكاكوة يوم الغيم والمطر

ومعاه روبيان مكشن بالقوطة والبصل والفلفل الأخضر وزلطة حمر وكيف لو كنا ساكنين في بلاد الخواجات على كدة

كل يوم معدوس ألين البطن تسير زي الطبلة..




الملوخية الخضرا

هادي تتعمل في اليوم الأول من السنة الهجرية الجديدة

·على الغدا من باب التفائل إنو ربنا يجعلها سنة خضرا وخير للجميع .



الحليب أبو الهيل

هادا برضو كمانة ينشرب في صبحية

·أول يوم في السنة الهجرية الجديدة




السليق
هادا يسووه في المناسبات لمن يكون الجو باااااااااااااااااارد


الدبيازة
معروفة على ما أعتقد للجميع يسووها للفطور أول يوم عيد الفطر
الزلابية و اللقيمات( اللنقطة )
أول ما ينقال اسمها نتزكر العيد والفطور حق العيد



المعمول و الغريبة :
يسووها في أيام الحج
السلالي و المقلقل و اللحم:
نفتكر على طول عيد الحج يندبح الطلي
ومايبقى شي منو تبارك الرحمن كل شي يتاكل فيه حتى الرجول يسوو بيها مقادم والمفاصل نلعب بيها كبوش



السمك
مايتاكل إلا في الشعبنة علشان في رمضان الناس ماتاكل السمك بس هيا كدة عادة شعبنة يعني اضرب سمك وصيادية



عشرة عاشورا ( 10 محرم ) رز زربيان الحلو و زلطة لبن أبو الفلفل



السحلب
يسووه في الأيام الباردة علشان يلم العضم ويدفي الجتة بالزات لو فيلو شوية جنزبيل



القهوة الحلوة
اللي يحطولها لوز بجلي مهروش طبعا هادي وقت البزورة ما ينجحو والا يسقطو يسوولهم هيا قيد ماتفرق لو البيت فيلو خمسة بزورة ناجحين وتلاتة صاقطين رايحين يلغو القهوة الملوزة



وغير أكلات رمضان الخشاف والسوقدانه والماسية و مكرونة باللبن و القطايف والسوبيا

 

[جـــودي]

واااااااي همووسه

ذكرتيني بهالاكلات خصوصا المعدوس والله له طعم خاص < امووت عليه

احنا ناكله غالبا بايام البررد اما القهوه الحلوه اتوقع انها السحلب عندنا

يعطيك العافيه يالغلا على هالموضوع النايس لا عدمناك

جــودي

 

[همس الحنين]

وانك صادقة يا سلام على المعدوس ويسلام على اكلات مكة المكرمة مشكورة جودى

 

[عيونكـ آخر أماليـ]

تسلمي هموسهـ
ع الاكلات
في شيء عرفته وشيء لم اعرفه
بس الاغلبية معروفه
اصبحنا في عصر العولمه وجميع اكلات الشعوب تتبادل
سلمتي غاليتي ع الطرح


تحياتي

 

[همس الحنين]

مشكورة ياغلا تي علي مرورك

 

[كبريــآء القلــم]

صرااحه ماعرف في اكلات اهل مكه ..

بسس بجربها ان شاء الله

يعطيكِ العافيه

 

[همس الحنين]

كبرياء قلم مشكورة على مرورك وردك