من ابداعات فهد المساعد

[بقايا جروح]

كل مــافي الأرض ينذر بـالـمفـارق والـغيـاب
اللقا .. والشمس وحـــروف الرسايل والقبور


وش بقى يوم أكتشفت أن آخر الدرب السراب
والـبحـر دمـع لـسـواحـل هـاجـرت عـنها الطيور !

مالحزني صوت .. مدري هو خطأ والا صواب
بـس أعـرف أنـي حـزيـن وصـوتـي الـلـيـلـه جـهور

مـن يـدّثر صـوتي الـلـيـله ويكسـب لــه ثـواب
مـــالـــها يــالشــعر غيرك أنـــت .. ياجبر الكســـور

يـكـفي أنـي .. لابـكـيـت بـدونـك أشـعـر بـإرتـيـاب
وكل ماأبكي فيك .. أشوفك لي عن اللي فيّ سور

أدري بــيــوتــك عــرايــــا .. لـكن أوزانـك ثـيـاب
لبّس جـروحـي مـن أحـزانـك وألـبّـسـك الـصــــــدور

كــان يــامــا كـــان والنـسيـان للـعـشّـاق بــــــاب
عــاشــق ٍ لاشـدّ درفــة بــاب .. صـاح بـلا شـعـور

يـقـدر الـنـسـيـان يـنـزع غــصــن من فوق التراب
بــس مـايـقــدر يــقـــرّب لـــلـــتراب ولـلـــجـــذور

كـيف أبـنـسى ذكـريات الـطيـش الأول والشبــاب
ورفــقـة الـلـيـل الـعـتـيـقـه .. وأول الـفـجـر الـطهور

والــمـواعيـد وشـغـبـهـا .. والـولـه قـبـل الـعـتـاب
وســاعـة ٍ كـم كـنـت أحـاول فـي عـقـاربـها تـــــــدور

والـمـكان اللي وهـن سـقـفـه مـن الـفـرقـا وشـــاب
مــن بــعــد مـــاكـان يـحـضّــنـا مـثـل طـفـل ٍ غـيــور

والـمـطر لا لـوّن الشـــارع .. وقـلـنــا لـلـسـحــــاب
بللّ أيدينا .. تــرى الـــعشّـــاق أيـــاديـــهـــم زهـــور

كـيـف أبـنـسـى والـريـاض لـسـيـرتـي مـثـل الـكتاب
حــافـظـتـني بـيـت بـيـت .. و حـي حـي .. و دوُر دوُر

مـن كـثـر مـاكـنـت أدوّر فـي شـوارعـهــــا جـــــواب
هو صحيح الحب أعــمى ! أو عيـون النـاس عــور

كــنت أشــوف الـحب عذب وهـم يـشـوفـونـه عــــــذاب
كــان هــذا الـحـب سـر ... وقـلـتـه وكـلي ســــــرور

عـلمّونـي فـي الـمـديـنـه كـيـف لاحـبـيـت أهــــــــــــاب
لـكـن الـقـريـه قـمـرهــــا قــــال : كـُـن لـلـحـب نــور

فـي بـلادي كـنـت عـاشـق .. بـس شـاعــر بــإغــتراب
لين صرت الشـاعـر اللـي تـعـشـقـه كـل الـبـحــور

عـلمّـيـني يــالـقـصـايـد هـــو خـــــطأ والا صـــــواب
لارفــضــت أنـسى عـيـون ٍ عـشـتـها شعر وشعور

هـــذا أنـــا لحالي .. هزيل الحــــال وأشعـــــر بإكتئاب
كـن قلـبـي جـال بـحـر ٍ هــاجـرت عنـه الـطـيــور

أجرع الفــرقا وأقـــول الـحــب عـــذب .. وللــعــذاب
كـــل قــــلب ٍ لاحـــرمه الـــوقـــت مـــن خلّه .. يبور

ولـيـن هـذا الـيـوم أدوّر فـي الـمـديـنـه عـن جـــواب
ليه في شرعك .. يكــــون الحــب معنى للفجور


==========
يا رفيف الماء .. وفجر العيـد .. وأحـزان الموانـي
يا أكثر أهل الأرض طيبـة قلـب .. وأسـرار دفينـه

عنـدي الليلـة كـلام و صمـت .. وأخـاف الثوانـي
تظلمه .. أو تظلـم اللـي فيـه كـم ضاعـت سنينـه

بـس لازم تسمعـيـن الـلـي أبــي ولا تـرانـي
لو بـأعيده لك نسيت ورحت أقول اللي تبينـه

شي واحد قبل ما أبـدأ .. مـا أبـي أي شـي ثانـي
يخطر فـ بالك .. وأنا أكشف لـك شعـور تجهلينـه

إن أنا .. وبكـل مـا تحملـه " أحبـك " مـن معانـي
كنت وراح أبقى أحبك لين مدري وش هو لينه

بـس والله ماقـدرت أنسـى .. ولا همـي نسـانـي
لا ذكـرت إنسـان .. فيـه أسـرار مابينـك وبينـه

كـل مـا تطـري علـي فكـرة هــواك الأولانــي
أشعـر إنـي أنطعـن مليـون مـره مـن يديـنـه

حتى اسمـك يـوم رحـت أدلله .. حظـي رمانـي
بنفس الاسم اللي يقول .. بذمتـك ماهـي غبينـه

وكنـي اللـي .. كـل مـا أناديـك بالاسـم الفلانـي
أطلـب النسيـان .. يتـرك منـه شـي تذكرينـه

لا تظنينـي أنانـي .. لا .. أنـا مانـيـب أنـانـي
لو سلمت من الغرق بـأمـوت فـي ظهـر السفينـه

يا إني ما أكمـل وأعانـي أو أكمـل ثـم أعانـي
كل ما اسمع طاري اسمه أو تجي عيني في عينـه

أينا كـان الضحيـه وأينـا اللـي كـان جانـي
مـدري ولكـن قـراري لازم إنــك تقبليـنـه:

مثـل مـا أكـره فكـرة إنـه واحـدٍ ياخـذ مكانـي
ما أقدر أجلس في مكـان إنسـان كنتـي تعشقينـه​